皇馬出手斟介　阿諾特心郁郁離紅軍？

皇家馬德里周二(16日)獲基利安麥巴比亮相後，即刻又為下一單重磅收購做準備，據報佢哋將會出手收購利物浦右閘阿歷山大阿諾特，而呢位英格蘭國腳亦對加盟皇馬「心動」。

德國《圖片報》消息，皇馬同阿歷山大阿諾特嘅代表已經密斟超過1個月，希望佢可以成為丹尼爾卡華積嘅接班人。呢位英格蘭國腳同利物浦合約只剩1年，而續約談判遲遲未有結果，意味佢1年之後可能自由轉會。

報道指阿歷山大阿諾特對轉戰西甲表示「好有興趣」，皇馬將會正式提出斟介，預計轉會費約6,000萬鎊。利物浦方面唔想放人，不過喺合約只剩1年下，可能亦會被逼進行談判。