FIFA查阿根廷歧視風波　美斯「不在現場」

阿根廷贏得美洲盃冠軍後，慶祝期間爆出種族歧視風波，一眾國腳喺隊巴內合唱侮辱法國黑人球員嘅歌曲，片段曝光後引嚟各界炮轟，法國足總作出投訴後，國際足協(FIFA)周三(17日)宣布將作出調查。阿根廷體育部副部長亦要求隊長美斯公開道歉，但消息指當時「球王」並唔喺隊巴內。

流出影片所見，多位阿根廷國腳喺隊巴內高唱種族歧視歌曲，但影片畫質唔高，要辦認邊個球員有份唱有一定難度，唯一「斷正」就係拍片嘅車路士中場安素費南迪斯，佢事後率先發出道歉聲明。國際足協周三宣布：「FIFA已得悉網上出現嘅影片，並且展開跟進，我哋強烈反對任何形式嘅種族歧視。」

據《ESPN》報道，美斯當時並冇隨球隊返國，而係留喺邁亞密療傷，所以並冇出現喺歧視風波嘅現場。