熱刺5比1炒赫斯　普帥寸爆回應教英格蘭傳聞

英超勁旅熱刺周四(18日)凌晨，喺蘇格蘭踢熱身賽作客5比1大炒赫斯，領隊普斯迪高路近日被傳係英格蘭新領隊目標，不過呢位澳洲教頭似乎冇意思上任，對傳聞寸爆回應：「唔好意思，我瞓咗！」

熱刺上半場有孫興民、古路施夫斯基同占士麥迪臣等主力領軍，並由比蘭莊臣入波領先1比0，換邊後改派新人出戰，一度被赫斯追平1比1，但之後發力連入4球，順利以5比1大勝而回。

近日有傳英格蘭足總搵新領隊，普斯迪高路都係目標之一，佢賽後回應：「唔好意思，我晏晝瞓咗覺，所以乜都唔知。我係熱刺領隊，依家只係專注為熱刺爭取好成績。」

普斯迪高路再被追問，將來有冇興趣教英格蘭，佢就話：「5年前我喺日本教波，依家就喺英超，5年之後係點邊個知？我可能返去日本，或者喺海灘歎緊世界呢！」