耶馬新球季改着19號　跟隨美斯步伐

啱啱協助西班牙贏得歐國盃冠軍嘅17歲神童拉明耶馬，周三(17日)宣布新球季會轉號碼，由上季27號變為19號，呢個「冧把」除咗係佢喺歐國盃嘅號碼，亦係美斯20年前喺巴塞隆拿出道，曾經用過嘅球衣號碼，耶馬將會跟隨球王成長步伐。

耶馬上季雖然係巴塞主力，但只係以青年軍身份被提拔，今個夏天正式註冊做一隊球員後，上季用嘅27號波衫亦會更換，原本球迷估計佢會改着「王牌」10號，但由於10號目前由安素法迪擁有，耶馬亦不奪人所好，決定着19號波衫。

美斯05/06球季喺巴塞上位，就係着19號波衫，3年之後先至成為「10號仔」。巴塞歷來都有唔少著名19號球員，包括阿古路、古華特等等，上季呢個號碼係由巴西前鋒域陀洛基擁有，有傳佢將會喺今個夏天被巴塞外借。