利物浦聘愛華頓名宿做助教　希汀加：一世藍軍！

利物浦喺轉會市場未有大動作，不過新領隊施洛就先擴充教練團，周三(17日)宣聘請希汀加做助教，呢位前荷蘭國腳曾效力死敵愛華頓5年，更曾宣稱「一日藍軍(愛華頓)，一世藍軍」，今次轉投利物浦都咪話唔尷尬。

現年40歲嘅希汀加，球員時代踢過阿積士、馬德里體育會、愛華頓同富咸等球會，掛靴後轉做教練，曾經擔任阿積士臨時教練，上季就喺韋斯咸做莫耶斯副手，同另外2位助教侯斯賀夫、魯賓比達斯一齊輔助施洛領軍。

希汀加效力愛華頓間上陣140場，11/12球季當選球會年度最佳球員，就算之後離開英超，佢亦繼續追隨愛華頓，2016年一場「默郡打吡」賽前，希汀加就喺社交網貼出佢向蘇亞雷斯「曬靴」相片，留言話：「今晚支持愛華頓！一日藍軍，一世藍軍！」