韋斯咸斟夏蘭特拍檔　西甲神鋒有望加盟

韋斯咸喺西班牙名帥盧比迪古執教下，新一季雄心勃勃，早前用4,000萬鎊收購麥斯基爾文後，據報近日力斟維拉利爾前鋒阿歷山大索洛夫，呢位挪威國腳上季入球拍得住國家隊隊友艾寧夏蘭特，射術唔使懷疑。

英國《每日郵報》報道，韋斯咸開價2,500萬鎊收購，但維拉利爾就堅持收齊合約內嘅解約條款(3,200萬鎊)，雙方目前正進行談判，消息指意甲球會羅馬亦有意加入戰團，韋斯咸如果要搶人就要加快收購速度。

28歲嘅阿歷山大索洛夫曾效力水晶宮，但全無表現下黯然離隊，去到西甲後愈戰愈勇，上季效力維拉利爾全季攻入26球，23個聯賽入波排西甲金靴獎第2位，如果下季重返英超，有望同國家隊拍檔艾寧夏蘭特大鬥法。