【官宣】格連活特着10號　馬賽再斟英格蘭前鋒

法甲名牌球會馬賽大展拳腳，周五(19日)官宣簽入英格蘭前鋒格連活特，呢位曼聯青訓將會着起10號波衫。據法國傳媒報道，馬賽計劃再簽另一英格蘭前鋒，領隊迪薩比希望羅致阿仙奴前鋒尼基迪亞，打造「英格蘭鋒線」。

22歲嘅格連活特2年前捲入虐打女友醜聞，之後被曼聯內部禁賽，雖然之後因女事主拒絕作證而撤銷檢控，但曼聯喺輿論壓力下仍決定放棄格連活特。今次以3,000萬歐元轉會馬賽，同樣受到法國政客批評，指簽入格連活特令馬賽蒙羞。

馬賽領隊迪薩比早前曾公開力撐格連活特：「佢係冠軍級國腳，我唔知佢私生活點，當球員加盟，我就當佢仔一樣，我可能會私下教導佢，但喺公眾面前一定會撐佢。」馬賽畀格連活特着埋10號波衫，顯示對呢位前鋒嘅信任。

完成收購格連活特後，法國媒體《La Provence》報道，迪薩比希望繼續喺英超招兵，目標係阿仙奴前鋒尼基迪亞，呢位25歲前鋒上季上陣機會極少，阿仙奴願意以2,000萬鎊將佢賣走，馬賽出手嘅話成事機會唔細。