安素面臨停賽12場　麥亞里士打開腔力撐

阿根廷國腳喺美洲盃奪冠後，涉種族歧視法國黑人球員風波持續，主角安素費南迪斯有機會受到英格蘭足總罰分，面臨停賽12場，不過效力利物浦嘅阿歷斯麥亞里士打就開腔力撐，成為首個公開支持安素嘅阿根廷國腳。

安素費南迪斯成為各界炮轟對象，連車路士隊友都同佢割席，其他阿根廷國腳近日亦紛紛潛水，對事件隻字不提。阿歷斯麥亞里士打周四(18日)接受阿根廷電台訪問，首度出聲支持安素：「我哋講嘢同做嘢都要好小心，尤其歐洲人特別敏感，事實係阿根廷並唔係一個種族歧視嘅國家。安素已經解釋過件事同道歉，我都冇乜好講，我哋熟悉安素，佢唔係種族主義者，佢唔會懷住惡意去講呢啲說話。」

國際足協(FIFA)已就今次事件展開調查，消息指FIFA一旦作出處分，對象會係阿根廷足總多過處分球員，不過英格蘭足總亦可能會展開調查，呢位車路士中場將面臨停賽6場至12場嘅處分。