曼聯計劃外借安東尼　只需符合一項條件

曼聯今夏轉會市場出手極具效率，除咗增兵夠果斷之外，亦陸續清洗表現欠佳球員，根據《ESPN》爆料，紅魔鬼準備外借翼鋒安東尼馬菲奧斯，只要有球會願意代為承擔7萬鎊(約70萬港元)周薪，就可以帶走呢位24歲巴西球星。

安東尼馬菲奧斯2年前以8,500萬鎊(約8.5億港元)轉會費由阿積士加盟曼聯之後，一直踢唔出應有身價，總共上陣82場僅入11球及5次助攻，不時傳出會方有出售佢，但未有其他球會問津。

最新消息指曼聯願意今夏外借安東尼，而且條件非常簡單，只要代為支付7萬鎊周薪就可以成事，亦有資料指安東尼現時周薪達20萬鎊，換言之，即使曼聯將佢外借去其他球會，仍然需要負擔部分人工。

曼聯今夏已經放走多位球員，包括將翼鋒格連活特出售去馬賽，將中場雲迪碧克、後衞甘華拉分別賣去基羅納、維拉利爾，加上安東尼馬迪爾、華拉尼約滿離隊，安東尼馬菲奧斯好可能成為下一位脫「魔」球員。