麥湯米尼轉會有變數　熱刺出手截劫

曼聯近期收購2位新兵約舒亞舒克斯、約羅，已豪花超過9,000萬鎊(約9億港元)，為咗符合英超財政規限，有必要出售部分現有球員，根據英國《太陽報》爆料，紅魔鬼計劃以4,000萬鎊(約4億港元)賣走中場麥湯米尼，原本富咸率先出手接貨，但現時另一支倫敦球隊熱刺加入爭奪，有望簽入呢位27歲蘇格蘭國腳。

麥湯米尼上季表現出色，各項賽事總共上陣43場入10球，創下職業生涯單季入球新高，但曼聯管理層仍然計劃出售佢，好大程度上因為早前賣走嘅球員轉會費收入唔多，對財政幫助有限，如果出售麥湯米尼，可望獲得4,000萬鎊收入，並已吸引多間球會注意。

土耳其勁旅加拉塔沙雷副會長哈迪保古早前承認斟介麥湯米尼，富咸亦提出報價，但只開出1,700萬鎊，已經被紅魔鬼拒絕，現時熱刺加入爭奪，令曼聯更加有議價能力。

熱刺上季英超排第5位，僅少第4位阿士東維拉2分，痛失歐聯入場券，為咗提升實力，新一季爭取佳績，相信增兵會比較闊綽，或者有機會滿足曼聯索價要求。