又係唱歌惹禍　洛迪莫拉達遭歐洲足協調查

西班牙早前奪得歐國盃冠軍，回國舉行慶功大會期間，中場洛迪卡斯簡迪、前鋒艾華路莫拉達喺台上高唱涉及「國家領土主權」爭議性歌曲，歐洲足協已經介入調查，一旦罪成，2人可能遭到處罰。

據悉洛迪卡斯簡迪、艾華路莫拉達當時喺台上高唱：「直布羅陀屬於西班牙、直布羅陀屬於西班牙。」引起直布羅陀足總強烈不滿，並向歐洲足協作出投訴，歐洲足協發表聲明，指已經就事件展開調查，強調足球絕不容許宣揚政治爭議。

直布羅陀接壤西班牙南部，原本屬於西班牙領土，1713年割讓畀英國，一直維持至今，但西班牙國內唔少人士仍然認為直布羅陀屬於西班牙，洛迪卡斯簡迪、艾華路莫拉達可能想趁捧歐國盃為國家宣示主權。

阿根廷早前贏得美洲盃冠軍後，有多位國腳喺慶祝活動時，涉嫌合唱侮辱法國黑人球員嘅歌曲，遭國際足協調查，主角安素費南迪斯更可能被英格蘭足總罰停賽12場，相信洛迪卡斯簡迪、艾華路莫拉達今次亦有手尾跟。