遠藤航推薦？利物浦有意收購久保建英

根據日本媒體《日本體育報》爆料，利物浦上年簽入遠藤航之後，非常滿意呢位日本國腳表現，計劃今夏再次收購「東洋兵」，目標直指有「日本美斯」之稱嘅久保建英，有可能用6,000萬歐元(約5.1億港元)直接買斷呢位23歲進攻中場。

久保建英年紀輕輕已經喺西甲打滾多年，近2季效力皇家蘇斯達表現更加大熟大勇，上季西甲上陣30場入7球及4次助攻，並協助球隊打入歐聯16強。據悉利物浦新領隊施洛一向非常欣賞日本球員，因為過去有唔少日本球員登陸荷甲，佢好清楚「東洋兵」嘅質素，更何況久保建英屬於日本一線球員，能力更加有保證，施洛深信佢可以喺英超立足，加上紅軍進攻主力穆罕默德沙拿已經32歲，並不時傳出佢有意離隊，簽入久保建英可以作為沙拿嘅接班人。

久保建英現時嘅毀約金為6,000萬歐元，估計利物浦只需要出4,000萬至5,000萬歐元轉會費就可以簽到佢。