季前熱身賽　熱刺齊腳打爆昆士柏流浪

英超勁旅熱刺季前積極熱身，星期六晚會作客昆士柏流浪。英冠球隊昆士柏流浪近年成績欠佳，上季只係排聯賽第18位，實力同擁有孫興民、占士麥迪臣等球星嘅熱刺有一段距離。睇番雙方近4次對賽，熱刺豪取3勝1和，客隊贏波值得睇好。（周六晚10時開賽）

昆士柏流浪過去兩季只能夠為護級而戰，上年10月底換帥，請到42歲嘅施富恩迪斯執教，即使保住英冠席位，但表現唔見有明顯改善，加上球會財力有限，未能大事增兵提升實力，預料新一季難有進步，今仗越級挑戰熱刺，應會捱打。

熱刺多位主力已經歸隊，早前閉門熱身賽7比2大破英甲球隊劍橋聯，之後作客蘇超球隊赫斯再贏5比1，南韓前鋒孫興民狀態唔錯，另一前鋒比蘭莊臣更連續兩場入波。占士麥迪臣、比蘇馬、迪姆華拿、古路施夫斯基、柏度樸路等主將悉數上陣，人腳相當齊整，相信今場可以輕取昆士柏流浪。