曼聯新中堅首操有料到　有望極速今晚上陣

曼聯日前豪花5,200萬鎊(約5.2億港元)收購里爾中堅約羅，呢位18歲新星已於周五(19日)首次參加紅魔鬼操練，表現備受認可，甚至有望周六(20日)晚上陣踢熱身賽對格拉斯哥流浪。

身高1米90嘅約羅進入曼聯訓練基地，獲得隊友熱烈歡迎，操練時非常認真，跑動速度快，作出唔少精準傳球，不時獲得隊友歡呼稱讚。

約羅接受訪問時話：「自從首次同曼聯方面對話之後，我好清楚自己未來發展，對於球會嘅計劃感到興奮，會方亦非常關心我同家人未來喺英國嘅生活，我知道曼聯係一支可以令年輕球員發揮潛能嘅球隊，我非常期待上陣。」曼聯將於香港時間周六(20日)晚上11點熱身賽對格拉斯哥流浪，約羅到時會唔會披甲，大家拭目以待。