英格蘭帥位有新人選　勒夫隨時跑出

修夫基辭去英格蘭國家隊領隊之位後，傳出多位名帥可能接任，根據英國《太陽報》爆料，前德國國家隊主帥勒夫成為最新一位人選，並有意毛遂自薦，佢曾經協助德國捧2014年世界盃冠軍，大賽經驗豐富，加上薪酬夠平，隨時可以跑出。

64歲嘅勒夫曾於2006至21年執教德國隊長達15年，取得2008年歐國盃亞軍、2010年世界盃季軍、2014年世界盃冠軍、2017年洲際國家盃冠軍，教波資歷深厚。

值得一提，勒夫當時擔任德國主帥，年薪僅250萬鎊(約2,500萬港元)，只及修夫基一半，相比起哥迪奧拿、杜曹、普捷天奴等名帥動輒近1,000萬鎊年薪，勒夫更加係「最抵玩」之選。

勒夫最近1次帶領球隊比賽，就係2021年6月歐國盃16強，德國0比2不敵英格蘭，佢已經3年冇教過波，會唔會同球壇脫節就不得而知。