拉比奧特約滿離開祖記　曼聯機會來了

意甲豪門祖雲達斯正式宣布，中場拉比奧特今夏約滿，雙方唔會續約，佢可以自由身離隊，曼聯一直有興趣簽入呢位29歲法國國腳，依家機會來了。

拉比奧特2019年夏天以自由身由巴黎聖日耳門加盟祖記，上年夏天約滿之後，曾經續約1年，但今次並冇再續約，意味可以免轉會費加盟其他球會。拉比奧特上季意甲上陣31場入5球及3次助攻，並有份協助法國打入今屆歐國盃4強，相信唔少球會有興趣簽佢。

曼聯曾於2022年及上年夏天，試圖簽入拉比奧特，但兩次都未能成功，據悉拉比奧特之所以離開祖記，主要因為佢提出希望獲得15萬鎊(約150萬港元)周薪被拒，如果曼聯可以滿足拉比奧特人工要求，相信佢應該願意成「魔」。