盧卡古為踢拿玻里　自願大幅減薪

經歷「災難性」一屆歐國盃後，比利時射手盧卡古面對現實，佢等待拿玻里斟介期間，自己決定大幅減薪，由稅後1,100萬歐元減到600萬歐元，希望加快轉會進程。

31歲嘅盧卡古在今屆歐國盃上陣4場，交出0入球1助攻，比利時亦於16強出局，現時佢嘅處境好尷尬，結束外借由羅馬返回車路士後，由於不在車路士計劃中，今夏將被出售或再度外借，轉會費定為3,500萬歐元。

干地今夏出山執教拿玻里，組軍方針都係依照之前執教國際米蘭模式，盧卡古之前同佢合作贏過意甲冠軍，依家當然想跟番佢，所以不惜減薪都想去拿玻里。

不過拿玻里會否買入盧卡古，仲有幾個條件，首先係視乎出售中鋒域陀奧森漢進展，據報巴黎聖日耳門正在斟介中，不過仍未完成交易，其次係拿玻里希望車路士再減低盧卡古嘅轉會費，始終「渣古」年紀唔細，唔值咁貴。