美臣蒙特大踢爭氣波　獲曼聯挽留

曼聯上場熱身賽以2比0擊敗格拉斯哥流浪，美臣蒙特大踢爭氣波，並貢獻1次助攻，根據「轉會權威」記者羅曼諾(Fabrizio Romano)爆料，紅魔鬼方面決定唔會出售呢位25歲英格蘭中場，希望佢新一季可以翻身。

美臣蒙特上年夏天以5,500萬鎊(約5.5億港元)轉會費由車路士加盟曼聯，並獲得7號球衣，但表現令人失望，加上經常受傷，上季英超僅上陣14場入1球，因此傳出曼聯準備出售美臣蒙特，並收購巴黎聖日耳門中場文路爾烏加迪。

不過，羅曼諾最新指出，即使曼聯簽入文路爾烏加迪，亦唔會賣走美臣蒙特，佢亦傾向留隊，並準備好以最佳狀態迎接新球季，證明實力。

另外，盛傳會被曼聯出售嘅查頓辛祖今場亦以正選上陣，係佢自2023年9月之後首次為紅魔鬼正選披甲，加上領隊坦哈格早前大讚呢位24歲翼鋒屬於球隊所需要嘅好球員，相信兩人已經冰釋前嫌，查頓辛祖新一季都有望留隊。