鳥倦知還！祖奧菲歷斯有望回歸賓菲加

葡萄牙國腳祖奧菲歷斯少年得志，未夠20歲就以1.26億歐元天價轉會馬德里體育會，可惜近年發展不似預期，上季外借巴塞隆拿後未獲買斷，據報24歲嘅佢將鳥倦知還重返葡超，賓菲加已證實同馬體會進行斟介。

祖奧菲歷斯同馬體會教練施蒙尼鬧翻後，對上2季先後被外借去車路士同巴塞隆拿，雖然佢表明想繼續為巴塞效力，不過馬體會叫價8,000萬歐元就令人卻步。據報祖奧菲歷斯母會賓菲加有意收購，會長雷哥斯達周六(20日)證實：「斟介進行緊，所以唔應該公開討論，賓菲加要嘅係好球員。」

據葡萄牙傳媒報道，賓菲加開價3,000萬歐元收購祖奧菲歷斯50%擁有權，目前未知馬體會願唔願意接受呢個條款，而英超勁旅阿士東維拉亦傳出想加入戰團，但依家都係只聞樓梯聲，未有實質行動。