車路士新帥「獨具慧眼」　想簽曼聯棄將

車路士今夏密密出手增兵，根據英國《太陽報》爆料，車仔新帥馬利斯卡計劃豪花3,500萬鎊(約3.5億港元)收購富咸中場安達斯彭利拿，呢位28歲巴西國腳曾經係曼聯棄將，估唔到現時身價大升，成為搶手貨。

據悉車路士中場干拿加歷查今夏可能離隊，另1位中場安素費南迪斯深陷種族歧視醜聞，面臨被重罰，甚至可能被隊友排斥，馬利斯卡認為有必要簽入中場，並睇中安達斯彭利拿，已經同佢嘅經理人接觸。

安達斯彭利拿近年曾被曼聯當成「人球」，外借去CF格蘭納達、華倫西亞、拉素、法林明高，2年前正式脫「魔」，以1,000萬鎊轉會費加盟富咸，立即獲得重生，近2季英超合共上陣70場入7球，並有份為巴西出戰今屆美洲盃。

法甲勁旅摩納哥都有意收購安達斯彭利拿，但佢傾向留喺英超搵食，據了解彭利拿同富咸達成口頭協議，如果有球會提出收購佢，會方必須放人，預料佢上「車」機會較大。