AC米蘭同16歲天才續約　佢係下一位耶馬？

意甲勁旅AC米蘭正式宣布同16歲新星卡馬達簽訂首份職業球員合約，為期3年，粉碎曼城等各大豪門挖角企圖。卡馬達上年11月首次為A米出戰意甲，以15歲零8個月16日成為意甲史上最輕上陣球員，被認為繼西班牙新星拉明耶馬之後，另一位足球神童。

卡馬達屬於米蘭土生土長球員，7歲已加入A米青年軍，佢上季「跳級」為AC米蘭U19比賽，上場41場入14球。上年11月，AC米蘭傷兵問題嚴重，向意大利足總申請畀當時未滿16歲嘅卡馬達提升上一隊比賽，佢對費倫天拿一役披甲，成為意甲史上最輕上陣球員。

卡馬達上月U17歐國盃有4球進帳，協助意大利奪得冠軍後，再次「跳級」現時正在出戰U19歐國盃，上仗分組賽對北愛爾蘭U19，個人梅開二度，協助意大利U19大勝3比0，2戰2勝已提早出線4強，卡馬達今夏隨時可以連捧2項錦標。