迪基亞神秘貼文　暗示即將復出？

迪基亞自從上年夏天約滿離開曼聯之後，一直未有球會落班，呢位33歲西班牙鋼門最新喺社交網「發貼」，簡單顯示一個「沙漏」圖案，引起唔少猜測，普遍網民認為迪基亞正在為復出作最後倒數。

迪基亞曾經2次奪得英超「金手套獎」，佢離開效力12年嘅曼聯後，被指不愁出路，但事實卻相反，並冇大球會斟介佢，期間只傳出韋斯咸、華倫西亞、貝迪斯等中型班球會有興趣簽佢，但最終不了了之，好大程度上因為無法滿足迪基亞人工要求，畢竟佢效力曼聯期間，擁有35萬鎊(約350萬港元)周薪。

雖然艾納斯等沙特阿拉伯球隊開出重金利誘迪基亞，但佢唔願意去中東搵食，結果一直冇波踢。迪基亞今次貼出「沙漏」圖案，似乎準備宣布重大消息，大部分人認為佢要向現實低頭，好可能加盟沙特球隊，但亦有人覺得迪基亞可能會宣布掛靴，至於最後答案係乜，相信短期內會揭曉。