紐卡素「讓愛」　斟普捷天奴接替侯域

根據英國《每日郵報》爆料，紐卡素領隊艾迪侯域成為英格蘭新帥大熱人選，會方已為失去呢位46歲少帥做準備，一旦艾迪侯域同意擔任「三獅兵團」領隊，紐卡素就會聘請前車路士主帥普捷天奴執教。

修夫基早前辭去英格蘭領隊之位，出現多位名帥人選，既有哥迪奧拿、普捷天奴、勒夫等外籍領隊，亦有艾迪侯域、樸達等「土炮」，艾迪侯域屬於英足總管理層嘅首選。

艾迪侯域似乎亦有意做修夫基繼任人，佢早前暗示，如果紐卡素要佢留隊，就必須給予佢更多自主權：「如果我做得開心，獲得會方支持，有充足自由度去工作，自然唔會諗離隊問題。」

英國《鏡報》指艾迪侯域一向以執教英格蘭為目標，如果英足總邀請佢領軍，佢冇理由拒絕，所以紐卡素做好兩手準備，已有新帥人選，如果艾迪侯域離隊，就會邀請普捷天奴執教。「肥普」今夏離開車路士後，未冇教職在身，佢始終以執教英超球隊為首選，有機會同紐卡素一拍即合。