曼聯被轟借格連活特發財　轉會收入要捐出？

曼聯上星期宣布將格連活特賣去馬賽，據報轉會費約3,000萬歐元。格連活特之前因捲入家暴醜聞，轉會後受到英國同法國球圈、政客猛烈抨擊，曼聯雖然已經「順應民意」踢走格連活特，但仍被批評借機「發財」，被要求將轉會費收入全數捐出。

英國反家暴運動發言人David Challen日前表示：「曼聯係國際級球會，年賺數億鎊，佢哋(家暴醜聞後)可以輕易炒咗呢個球員，但曼聯選擇留住佢嚟賺錢，即係話畀人知財務比女性權益更重要。曼聯對女性權益連基本關心都冇，格連活特事件之前，佢哋1分錢都冇捐過畀本土嘅女權組織。」Challen提出曼聯應該將今次轉會收益全數捐出。

格連活特2年前被控傷害他人身體、意圖強姦同非法控制他人等罪名，但因關鍵證人(女事主)拒絕作證，上年獲警方撤銷指控，不過各地女權組織仍然對佢咬住唔放。呢位英格蘭前鋒下月有望重返英國踢波，馬賽下月2日會去英格蘭友賽新特蘭，格連活特有望喺醜聞後，首度喺英格蘭比賽。