紐尼沙軒首領軍出醜　多蒙特食巴吞聯4蛋

德甲勁旅多蒙特正進行亞洲之旅，周日(21日)作客泰國勁旅巴吞聯，係新教練紐尼沙軒首度領軍，結果佢哋上、下半場各失2球，以0比4大敗而回。紐尼沙軒賽後炮轟球員表現差勁，指舟車勞頓並唔係慘敗嘅藉口。

多蒙特今次亞洲之旅，缺少富克洛、尼高舒洛達碧克、華迪馬安頓等德國國腳，新加盟嘅前鋒古拉斯亦未候命，不過「蜜蜂兵團」仍有祖利安白蘭特、艾迪耶美、施巴斯坦賀拿同歷卡斯蘇尼等主將，最後慘輸0比4令球迷非常意外。

夏天接手後第1次領軍嘅紐尼沙軒，賽後發火表示：「呢件事唔應該發生，我知球員近排練得好辛苦同好疲倦，但呢啲唔可以作為藉口。我唔滿意球隊嘅防守表現，好多好基本嘅犯錯根本同對腳勊唔勊冇關係，我哋需要作出改善。」

多蒙特星期三(24日)會去日本對大阪櫻花，同昔日球員香川真司交鋒。