阿仙奴出發美國　富安健洋膝傷抖3星期

阿仙奴日前閉門熱身賽2比0贏奧連特後，大軍周一(22日)起程飛美國進行集訓，而出發嘅26人大軍當中，有12個係由青年軍球員「填數」，日本國腳富安健洋更喺近日膝頭受傷，據報將會缺席整個季前熱身。

由於多位踢歐國盃同美洲盃嘅主力未歸隊，今次出征大軍要12個青年軍幫手湊數，其餘主力包括馬田奧迪加特、加比爾捷西斯、湯馬士柏迪、賓韋特、辛真高、祖利安添巴、李安度杜沙特同佐真奴費路等都有隨隊。

不過喺歐國盃期間受傷嘅基蘭泰亞尼，同埋日本守將富安健洋將會留喺倫敦療傷，報道指富安健洋日前膝部受傷，檢查後預計要抖2至3個星期，成個季前熱身計劃面臨報銷。阿仙奴喺美國將進行3場熱身賽，分別對般尼茅夫、曼聯同利物浦。