占士洛迪古斯解約　準備再返馬德里？

33歲嘅哥倫比亞球星占士洛迪古斯，今夏美洲盃突然重生兼光芒四射，交出破紀錄嘅6次助攻當選賽事MVP，證明自己仲有貨賣。據報占士洛迪古斯周一(22日)同聖保羅達成解約協議，將以自由身身份重返歐洲球壇，傳聞有機會加盟馬德里體育會。

轉會權威Fabrizio Romano報道：「占士洛迪古斯同聖保羅已同意提前解約，美洲盃之後佢已經準備離隊，即將可以自由轉會，占士洛迪古斯希望可以重返歐洲比賽。」占士洛迪古斯上年加盟聖保羅，但踢唔出水準而未受重用，今季只係後備上陣2次踢咗36分鐘。

據報呢位前皇家馬德里球星，有望重返馬德里比賽，西班牙媒體《El Nacional》指馬德里體育會同皇家蘇斯達，都有意簽入呢位中場球星，尤其馬體會教練施蒙尼對佢非常欣賞，喺2019年同2021年兩次無限接近轉會，今次佢可以自由身轉會，令成事機會大大提升。