占士洛迪古斯解约　准备再返马德里？

33岁嘅哥伦比亚球星占士洛迪古斯，今夏美洲杯突然重生兼光芒四射，交出破纪录嘅6次助攻当选赛事MVP，证明自己仲有货卖。据报占士洛迪古斯周一(22日)同圣保罗达成解约协议，将以自由身身份重返欧洲球坛，传闻有机会加盟马德里体育会。

转会权威Fabrizio Romano报道：“占士洛迪古斯同圣保罗已同意提前解约，美洲杯之后佢已经准备离队，即将可以自由转会，占士洛迪古斯希望可以重返欧洲比赛。”占士洛迪古斯上年加盟圣保罗，但踢唔出水准而未受重用，今季只系后备上阵2次踢咗36分钟。

据报呢位前皇家马德里球星，有望重返马德里比赛，西班牙媒体《El Nacional》指马德里体育会同皇家苏斯达，都有意签入呢位中场球星，尤其马体会教练施蒙尼对佢非常欣赏，喺2019年同2021年两次无限接近转会，今次佢可以自由身转会，令成事机会大大提升。