賀蘭特跟修夫基離隊　賓韋特有望返英軍

修夫基早前宣布辭任英格蘭領隊，助教賀蘭特亦會一齊離開，據報隨住今次教練團變動，之前拒絕英格蘭徵召嘅賓韋特，有望重返國家隊，為下一任嘅英格蘭領隊效力。

26歲嘅賓韋特喺卡塔爾世盃期間，突然宣布因「私人原因」離隊，自此就再冇為英格蘭披甲，修夫基今年3月證實曾召呢位阿仙奴球星入伍，但就受到拒絕。據報賓韋特同修夫基關係並冇問題，但同助教賀蘭特曾經發生衝突，傳聞指賀蘭特喺卡塔爾世盃期間，曾當住所有球員面前批評賓韋特對足球冇興趣，令賓韋特耿耿於懷。

英格蘭嘅基爾獲加、捷比亞、史東斯、李維士鄧克、哈利馬古尼等後防都已過30歲，新領隊需要尋找接班人，可以踢右閘同中堅位置嘅賓韋特就好使好用，依家賀蘭特跟埋修夫基一齊離開，將打通賓韋特返英格蘭國家隊大門。