PSG同查頓辛祖達協議　曼聯放唔放人？

多間法國傳媒報道，巴黎聖日耳門(PSG)與查頓辛祖達成個人協議，之後就要等曼聯取態如何，如果放人，兩間球會就會展開轉會談判。

24歲嘅查頓辛祖一直在曼聯出售名單排前幾位，皆因佢周薪超過30萬鎊，但交唔出應有水準，上季初仲同主帥坦哈格不和而遭雪藏，不過佢上季中外借重返多蒙特，表現脫胎換骨，仲幫多蒙特殺入歐聯決賽，曼聯上下對佢刮目相看，坦哈格主動同佢和解，最近畀佢重返一隊練波，仲喺熱身賽上陣。

PSG今季有基利安麥巴比離隊，斟介域陀奧森漢受阻後，會方轉移目標斟介查頓辛祖，認為佢係麥巴比邊路進攻嘅替代人選，上季歐聯4強多蒙特淘汰PSG，已經驗證佢嘅能力，雙方斟介過程順利，查頓辛祖對加盟PSG極感興趣，對加盟條件亦滿意。

曼聯之前對查頓辛祖轉會費定價為5,000萬歐元(約4.25億港元)，以PSG財力收購不成問題，就等曼聯回覆是否放人。