保羅戴巴拿大婚　美斯因傷缺席

阿根廷前鋒保羅戴巴拿與相戀6年嘅模特兒歌手奧莉安娜上周六(20日)在首都布宜諾斯艾利斯舉行婚禮，多位國家隊隊友到賀，不過隊長美斯因傷缺席。

30歲嘅保羅戴巴拿係2022卡塔爾世盃冠軍隊成員，而佢妻子28歲嘅奧莉安娜既係藝人，亦係網球名將莎芭天妮姪女，IG粉絲超過600萬，今次婚禮喺阿根廷都好大件事，婚禮細節要嚴格保密，甚至要簽署保密協議，賓客要交出手機，放喺有編號嘅袋入面，以確保私隱。

由於唔知婚禮內容，傳媒集中報道出席賓客有咩人，其中阿根廷國家隊成員到場成為焦點，據報出席球員計有迪馬利亞、安素費南迪斯、里安度柏利迪斯、盧施素、基斯甸羅美路同迪保羅等。

最可惜係「大佬」美斯缺席，佢喺美洲盃決賽受傷，留喺美國治療冇去到，至於巴黎奧運3子祖利安艾華利斯、奧達文迪同門將魯利亦未能出席。