主力被沙特挖角　曼城焗斟伊斯當拿隆馬

曼城完成英超4連霸壯舉後，中場奇雲迪布尼同門將艾達臣摩拉斯受到沙特球隊高薪挖角，最重要係球員唔抗拒去中東賺最後一桶金，「藍月亮」唯有面對現實，物色代替人選，睇中伊比爾治伊斯同基安盧基當拿隆馬。

奇雲迪布尼被挖角，曼城認為26歲嘅伊比爾治伊斯係代替人選之一，佢係水晶宮10號仔，上季上陣31場入11球6助攻，有份入選今屆歐國盃，上陣3場；不過水晶宮今夏已放走米高奧利斯，唔會輕易再放伊比爾治伊斯，佢同水晶宮仲有3年約，合約中有6,000萬鎊(約6億港元)解約金條款。

艾達臣摩拉斯一旦離隊，曼城將會力斟巴黎聖日耳門意大利國腳基安盧斯當拿隆馬。雖然意大利今屆歐國盃踢得差，但25歲嘅當拿隆馬反而打得好，救咗唔少必入波，現時呢位鋼門仲同PSG傾緊續約，但PSG早前又簽入俄羅斯門將沙科洛夫，令當拿隆馬有離心，若然曼城斟介，當拿隆馬答應都係好合理。