日本媒體爆料　久保建英接近加盟利物浦

利物浦喺今個夏天轉會市場表現淡靜，不過一出手就嚇人一跳，據日本媒體《Sports Nippon》報道，利物浦接近用6,000萬歐元簽入久保建英，呢位23歲日本國腳嘅經理人更飛去英國談判，更指轉會已進入最後階段。

據《Sports Nippon》報道，久保建英今年2月同皇家蘇斯達續約到2029年，但當中有6,000萬歐元買斷條款，利物浦將會啟動條款買人，而且會向久保建英開出1,500萬歐元年薪合約，成事嘅話會係日本足球史上最貴轉會。

報道指久保建英嘅代表已飛去英國進行最後談判，呢位右翼對轉會亦好有信心，而且已開始學英文，加上利物浦本身已有佢嘅國家隊隊友遠藤航，相信會令久保建英更加容易適應。