【官宣】維拉破轉會費紀錄簽入奧拿拿

阿士東維拉為提升實力，迎接來季英超及歐聯雙線作戰，不惜工本，正式宣布簽入愛華頓中場阿馬度奧拿拿，轉會費高達5,000萬鎊(約5億港元)，成為維拉史上最貴收購，雙方簽約5年。

阿士東維拉近期密密增兵，早前已經簽入伊恩馬特臣等多位球員，今次更加搶贏拜仁慕尼黑、巴塞隆拿，豪花5,000萬鎊收購阿馬度奧拿拿，令呢位22歲比利時國腳超越上年加盟嘅穆沙戴亞比(4,600萬鎊)，成為維拉史上最高身價球員。不過，維拉早前以4,200萬鎊將杜格拉斯雷斯出售畀祖雲達斯，足以抵消阿馬度奧拿拿大部分轉會費。

阿馬度奧拿拿過去2季為愛華頓各項賽事合共上陣72場入4球，並有份為比利時出戰今屆歐國盃，呢位防守中場攔截力強，獲得拜仁慕尼黑、巴塞隆拿等多間大球會垂青，但佢始終希望留喺英超搵食，令維拉佔先機，維拉今夏已經簽入8位球員。