熱刺展開亞洲之旅　2西班牙兵慘被遺棄

英超勁旅熱刺周二(23日)展開亞洲之旅，佢哋會喺日本同南韓踢3場熱身賽，不過2位西班牙球星利古朗同拜恩基爾就慘成「孤兒仔」，留喺倫敦等住被賣走。

熱刺第1站係去日本對神戶勝利船，之後就會去隊長孫興民嘅「主場」南韓，同韓職明星隊踢表演賽，最後一站就對有哈利卡尼、艾歷迪亞倒戈嘅拜仁慕尼黑。

領隊普斯迪高路今次亞洲之旅大軍，有孫興民、李察利臣、占士麥迪臣等球星隨隊，但左閘利古朗同翼鋒拜恩基爾就被遺棄，預示2人好大機會被賣走。

利古朗上季先後被外借去曼聯同賓福特，熱刺已決定將佢掛牌；至於拜恩基爾3年前加盟後不斷被外借，上季留隊但未受重用，全季只係踢過2場正選，傳聞白禮頓同基羅納對佢有興趣。