夏蘭特變冇牙老虎 曼城殘陣裝兇作「細」
2024年07月23日 19:01
東網電視
更多新聞短片
![](/hk/bkn/cnt/sport/20240723/photo/bkn-20240723190128746-0723_00882_001_01p.jpg?20240723165822)
熱身賽曼城對些路迪。
英超冠軍曼城展開「美國之旅」季前熱身賽,首站喺北卡羅萊納州教堂山迎戰些路迪,「藍月亮」缺少奇雲迪布尼、洛迪卡斯簡迪、菲爾科頓、史東斯、基爾獲加及祖利安艾華利斯等多位有份參加歐國盃或美洲盃嘅主力,鋒線上單靠艾寧夏蘭特、基亞利殊攻堅,攻力大減,加上開操不久,狀態成疑,難以大勝對手。翻查曼城近6場熱身賽有5次總入球開3球或以下,今場預計入球都唔會多。(周三早上7時30分開賽)
曼城主帥哥迪奧拿批准奇雲迪布尼、謝利美杜古、貝拿度施華、魯賓戴亞斯、文路爾艾簡治、尼敦阿基延長假期,6名主力將會於8月5日歸隊。另外有份踢歐國盃決賽嘅洛迪卡斯簡迪、菲爾科頓、史東斯、基爾獲加,以及為阿根廷踢美洲盃決賽嘅祖利安艾華利斯,仍然未有歸期,新簽巴西翼鋒沙維奧亦冇隨行。今次「美國之旅」大軍名單只有艾寧夏蘭特、基亞利殊、奧斯卡波比、歷高利維斯、兩位門將艾達臣摩拉斯、史堤芬奧迪加屬於一隊常規球員。
眾所周知艾寧夏蘭特非常依賴隊友傳送先至入到波,缺少奇雲迪布尼等猛將支援「餵波」,恐怕呢位挪威射手孤掌難鳴,隨時變無牙老虎。加上哥迪奧拿旨在試陣,預料比賽過程會大量換人,唔可以用平常角度量度「藍月亮」今場水準。
至於蘇超球隊些路迪方面,佢哋喺對曼城之前,已經踢咗3場熱身賽,並取得全勝,理論上狀態較佳,有望拉近同「藍月亮」實力距離;加上領隊羅渣士曾於英超打滾多年,非常熟悉曼城,相信有方法抵禦對手攻勢,就算輸都係小負居多。
更多賠率: