商業價值驚人　麥巴比波衫銷量係比寧咸5倍

皇馬簽入基利安麥巴比，未開波已先賺一筆，根據西班牙《馬卡報》爆料，呢位法國國腳加盟「銀河艦隊」後，佢件9號皇馬球衣嘅銷量係祖迪比寧咸上年加盟同期嘅5倍，可見其商業價值遠勝比寧咸。

祖迪比寧咸上年夏天接過皇馬5號球衣，由於呢個冧巴曾經屬於球王施丹所有，一度引起搶購潮，但相比麥巴比嘅9號球衣銷量，簡直係小巫見大巫。一來祖迪比寧咸加盟皇馬時候，名氣未算太大，更加唔可以同麥巴比地位相提並論，二來麥巴比嘅偶像C朗加盟皇馬首季，都係着9號，麥巴比今次繼承偶像「衣缽」，充滿話題性，令9號球衣更加搶手。

據悉皇馬會方有信心來季可以賣出超過400萬件麥巴比9號球衣。