費倫巴治成「老將樂園」　費特泰迪治齊貢獻助攻

費倫巴治喺歐聯第2圈外圍賽首回合，作客以4比3擊敗盧加諾，除咗38歲前鋒迪斯高射入3球之外，另外2位老將杜辛泰迪治、費特表現亦搶眼，各自貢獻1次助攻，呢支上季土超亞軍成為「老將樂園」。

31歲嘅費特曾經效力曼聯5年，大部分時間表現飽受批評，上年8月脫「魔」加盟費倫巴治，獲得重生。呢位巴西防守中場攔截力強之餘，進攻上亦有建樹，上季土超聯賽上陣25場入3球及4次助攻，成為另一位離開曼聯，就立即翻生嘅球員。

至於35歲翼鋒杜辛泰迪治上年夏天離開阿積士，以自由身加盟費倫巴治，演出更加搶鏡，上季土超聯賽做出「雙雙」，上陣38場入10球及14次助攻，果然老而彌堅。

當然最犀利都係迪斯高，上季為費倫巴治各項賽事上陣46場入25球，包括聯賽有21球進帳，射手榜上僅次於入25球嘅莫路伊卡迪。費倫巴治擁有「三大長老」助陣，加上今季有摩連奴領軍，唔只有力挑戰土超錦標，甚至有望打入歐聯正賽。