夏蘭特入波都冇用　曼城不敵些路迪

周三(24日)早上曼城「美國之旅」首仗熱身賽，就遭受打擊，即使射手艾寧夏蘭特頂入1球，仍然以3比4不敵些路迪，「藍月亮」殘陣之下，將於下仗對意甲勁旅AC米蘭，恐怕情況更加唔樂觀。

由於曼城有多位球員因為分別踢完歐國盃及美洲盃之後，仍然處於休假，今仗正選陣容只有艾寧夏蘭特、基亞利殊屬於常規主力，結果開賽13分鐘就失守，被些路迪前鋒尼高拉斯古恩射入大門。

雖然新星奧斯卡波比建功為曼城扳平，但球隊畢竟踢今夏首場熱身賽，整體狀態唔及已踢咗3場嘅些路迪，尼高拉斯古恩再入1球及1次助攻，為呢支蘇超勁旅上半場領先3比1。

奧斯卡波比成為曼城今仗表現最搶眼球員，呢位21歲挪威翼鋒下半場貢獻2次助攻，造就佩朗尼、艾寧夏蘭特入波，為「藍月亮」扳平3比3。不過，些路迪後勁勝一籌，透過反擊由後備上陣嘅路易斯柏馬射入空門贏4比3。

曼城將於周日(28日)早上踢第2場熱身賽對AC米蘭，2位克羅地亞國腳高華錫、加華度爾屆時有望歸隊助陣，或者可以幫到「藍月亮」。