阿仙奴成票房毒藥　鬥曼聯波飛滯銷

英超2大豪門阿仙奴、曼聯都去咗美國進行季前集訓，並將於周日(28日)早上交鋒踢熱身賽，根據英國《每日郵報》爆料，今場大戰門票出現滯銷，仲有近2萬張波飛未賣出，「仙魔之戰」魅力似乎吸引唔到美國球迷。

今場比賽將於加州洛杉磯嘅SOFI體育館舉行，球場可以容納超過70,000位觀眾，但現時只賣出51,000張門票，如果情況冇改善，屆時比賽可能出現大量空位。有網民認為阿仙奴始終星味稍遜，拖累票房數字，因為將於8月4日早上同樣喺美國舉行嘅「雙紅會」曼聯對利物浦，67,594座位已經賣出超過60,000張門票，相信開波會全場爆棚。

值得一提，曼聯即使有多位主力休假仍未歸隊，但「美國之旅」季前熱身賽門票仍然非常昂貴，最平都要126美元(約984港元)，最貴要667美元(約5,200港元)。