沙特球隊打退堂鼓　卡斯米路留效曼聯

曼聯計劃今夏出售中場卡斯米路，曾經傳出沙特阿拉伯豪門艾納斯有意簽入呢位32歲巴西國腳，但根據英國傳媒報道，艾納斯已經打退堂鼓，其他沙特球會亦冇興趣簽入卡斯米路，意味佢新一季將繼續留效曼聯。

卡斯米路上季英超上陣25場僅入1球及2次助攻，紅魔鬼早已打算放走佢，標價3,000萬鎊(約3億港元)，但冇歐洲球會問津。加上呢位防中周薪高達35萬鎊(約350萬港元)，以佢目前水準，相信只有沙特球隊先至會提供「肥約」。據悉的確有沙特球隊曾經接觸曼聯，但談判之後冇晒下文。

「轉會權威」記者羅曼諾(Fabrizio Romano)指曼聯渴望出售卡斯米路，但卻冇收到任何球會報價，英國《天空體育》更加斬釘截鐵指卡斯米路一定留隊。

曼聯開操之後踢2場熱身賽，卡斯米路都擔任正選，相信領隊坦哈格已經預咗佢留隊。