皇馬愛老將　加入爭奪曉姆斯

皇馬繼同38歲中場莫迪歷續約之後，準備再向老將埋手，根據意大利《米蘭體育報》爆料，「銀河艦隊」加入爭奪今夏恢復自由身嘅35歲德國中堅曉姆斯，希望簽入佢代替離隊嘅拿祖費南迪斯。

曉姆斯今夏約滿離開多蒙特，意甲球隊博洛尼亞已經出手斟介佢，希望簽入曉姆斯，頂替好大機會轉投阿仙奴嘅中堅卡拉科利。不過，雙方就薪酬問題出現分歧，博洛尼亞開出200萬歐元(約1,700萬港元)年薪，曉姆斯要求300萬歐元(約2,550萬港元)年薪，可能令談判破裂。

據悉皇馬打算乘虛而入，以「銀河艦隊」財力，要滿足曉姆斯300萬歐元年薪要求，應該冇問題。由於皇馬上季多位中堅輪流受傷，加上拿祖費南迪斯早前已離隊去沙特阿拉伯搵食，教練安察洛堤希望簽入1位經驗豐富中堅，曉姆斯無疑係合適人選。

曉姆斯上季為多蒙特各項賽事合共上陣40場，並有4球進帳，協助球隊打入歐聯決賽，可以話係寶刀未老，相信有能力喺皇馬立足。