阿諾特拒上「艦」　將續約等做利物浦隊長

近期盛傳西甲豪門皇馬計劃收購利物浦後衞阿歷山大阿諾特，甚至出動同屬英格蘭國腳嘅祖迪比寧咸做說客，邀請佢加盟。不過，根據英國《太陽報》爆料，阿歷山大阿諾特拒絕轉投「銀河艦隊」，準備同紅軍續約，等將來擔任隊長。

阿歷山大阿諾特只剩下1年合約，呢位25歲防線全能戰士去留備受關注，據悉利物浦已經向佢開出1份新約。根據1位紅軍內部人士透露，阿諾特同新領隊施洛討論後，對於球隊未來發展充滿期待，傾向留隊：「歐國盃舉行之前，阿諾特同施洛已經交談過，效果非常好，兩人對於新球季充滿信心，會方將為阿諾特提供1份巨額合約，令佢留隊。」

阿歷山大阿諾特過去6季都係利物浦主力，上季各項賽事上陣37場，並有3球進帳，佢上年7月榮升副隊長，由於現任隊長華基爾雲迪積克已經33歲，紅軍生涯進入倒數，只要阿歷山大阿諾特留隊，相信下任隊長非佢莫屬。