車路士主帥一錘定音：安素肯定留隊

阿根廷早前舉行捧美洲盃冠軍慶祝活動期間，有國腳唱種族歧視歌曲，引發巨大風波，主角安素費南迪斯被指得罪晒一班車路士黑人隊友，甚至傳出會方可能出售呢位中場，以免影響團結性。最新發展，車仔新帥馬利斯卡開腔澄清，指安素同隊友並冇矛盾，佢仍然會留隊。

馬利斯卡話：「我認為今次事件唔會對球隊造成不利影響，我已經同安素費南迪斯及其他球員傾過，安素亦已經道歉，佢同隊友並冇矛盾，所有問題已澄清及解決，球會亦發表聲明，隊內並冇任何壞份子。」

車路士上年1月以天價1.21億歐元(約10億港元)向賓菲加收購安素費南迪斯，呢位23歲中場上季各項賽事上陣40場入7球，屬於球隊正選，加上身價不菲，無論如何，車仔都唔會輕易放走佢。