安素歧視歌累全國　阿根廷運動員成巴黎公敵

阿根廷早前贏得美洲盃冠軍後，安素費南迪斯等國腳喺隊巴內唱種族歧視法國球員嘅歌曲，令法國同阿根廷喺2022年世盃決賽後嘅「牙齒印」再加深。今屆巴黎奧運，阿根廷運動員就成為法國公敵，阿根廷男足首當其衝，就連阿根廷7人欖球隊亦受到牽連，出賽嗰陣被主場觀眾狂噓。

阿根廷喺男足首場賽事對摩洛哥，賽前奏國歌環節傳出極大噓聲，唔夠1個鐘頭之後，阿根廷7人欖球隊對肯尼亞嘅賽事亦有同一命運，播阿根廷國歌期間又被喝倒采，相信同阿根廷近期種族歧視風波有直接關係，之後出場嘅阿根廷運動員恐怕亦會成為法國觀眾嘅「敵人」。

歧視風波爆發後，主角安素費南迪斯被車路士嘅法國隊友炮轟，佢亦第1時間公開道歉，不過阿根廷總統同埋唔少國民，都力撐阿根廷球員冇做錯，而法國體育部長Amelie Oudea-Castera上星期亦公開批評阿根廷球員嘅行為。2年前卡塔爾世界盃決賽，阿根廷擊敗法國奪冠後，部份球員挑釁性慶祝，已引起法國國民強烈不滿。