海倫升呢做「海9」　印證主力地位

曼聯上年簽入丹麥前鋒海倫，不過佢嘅表現令人失望，球隊夏天再簽入荷蘭前鋒約舒亞舒克斯，令人懷疑海倫地位不保。不過曼聯周三(24日)宣布，海倫新一季將轉着9號波衫，表明佢將「領銜鋒線」，而舒克斯就有望承接海倫件11號波衫。

海倫上季加盟後着11號，但隨住原本9號主人安東尼馬迪爾離隊，海倫就決定改着9號，曼聯官方形容呢位新9號「準備好領銜鋒線」，而「海9」亦喺社交網興奮留言：「盡情表演！」曼聯之前嘅9號有唔少猛人，包括高爾、貝碧托夫、伊巴謙莫域同盧卡古等等。

有份踢夏天歐國盃嘅海倫同基斯甸艾歷臣，周二(23日)已飛返曼徹斯特報到，並會隨隊出發去美國進行季前集訓，並會同阿仙奴、貝迪斯及利物浦踢3場熱身賽。