【官宣】伊蒂哈德5,000萬鎊簽戴亞比

沙特阿拉伯豪門伊蒂哈德今個夏天大事招兵，周四(25日)宣布成功用5,000萬鎊，向阿士東維拉收購法國翼鋒穆沙戴亞比，雙方簽約5年。

25歲嘅穆沙戴亞比上年先至以5,200萬鎊加盟維拉，立即成為球隊主力，估唔到1年後就轉戰沙特，呢位曾11次代表法國上陣嘅翼鋒表示：「好興奮加盟伊蒂哈德，呢間歷史性球會希望打造一支強隊，好期待同隊友一齊爭勝，將歡樂帶畀球迷。」

伊蒂哈德今季聘請法國名帥白蘭斯執教，陣中已有賓施馬、尼高路簡迪、法賓奴等球星，早前亦成功簽入阿爾及利亞中場艾奧亞，據報喺收購穆沙戴亞比後，球會仲想簽入曼城門將艾達臣摩拉斯。