阿諾特新合約周薪達30萬鎊　全隊第2高！

利物浦球星阿歷山大阿諾特，近期盛傳受到皇家馬德里挖角，由於呢位英格蘭國腳只剩1年合約，明年有機會自由身離隊。據報利物浦決定出重金留人，合約高達30萬鎊周薪，僅次穆罕默德沙拿成為隊中第2高薪球員。

25歲嘅阿諾特目前周薪19萬鎊，利物浦要同佢再續新約，不惜開出30萬鎊周薪4年新約。英國《太陽報》引述消息人士爆料：「阿諾特同施洛傾過，佢對利物浦嘅新計劃好興奮，亦非常期待新球季再為紅軍上陣，利物浦將會開出一份巨額新合約畀佢。」

目前利物浦最高薪球員係穆罕默德沙拿，周薪達35萬鎊，排第2嘅華基爾雲迪積克有22萬鎊周薪，佢同利物浦亦只剩1年合約。

阿諾特上年成為利物浦副隊長，不過佢嘅右閘位置就受到新星干拿巴特利挑戰，消息指皇馬希望收購阿諾特作為老將丹尼爾卡華積嘅接班人，目前正密切注意阿諾特同利物浦嘅續約情況。