曼联闹“闸荒”　同国米酝酿惊天换人

英超劲旅曼联夏天积极组军，不过阵容仍然有唔少缺陷，球队依家进行嘅美国之旅就闹“闸荒”，只得番一个一队闸位球员，而且仲系被挂牌出售嘅云比沙卡。据《The Athletic》报道，曼联计划优先签入铁闸，目标直指荷兰国脚杜费斯，甚至准备用云比沙卡直接交换。

曼联本身闸位球员唔多，劳基梳尔、达洛治踢完欧国杯后未归队，荷兰新人杜维尔马拉西亚上季重伤报销后，原本以为夏天集训可以回归，但曼联今次美国之旅名单，马拉西亚仍然冇份，而系继续留英国疗伤，复出无期。曼联早前热身赛，都要搵青年军左闸森梅利顶上。

权威媒体《The Athletic》消息，曼联原本打算将云比沙卡卖畀韦斯咸，再收购拜仁慕尼黑嘅马沙拉奥，但云比沙卡拒绝转会韦斯咸，而属意加盟意甲国际米兰。报道指曼联已透过中间人同国米接洽，希望用云比沙卡交换对方嘅荷兰右闸杜费斯，28岁嘅杜费斯亦唔抗拒加入曼联嘅“荷兰帮”。

传闻曼联可能会再物色一名可以同时胜任左、右闸嘅球员，今夏欧国杯光芒四射嘅土耳其球星卡迪奥卢，亦同曼联扯上关系，呢位效力费伦巴治嘅24岁球员，转会费约3,000万欧元。曼联将喺周日(28日)朝早同阿仙奴踢热身赛，如果云比沙卡仍未离队，将会同森梅利出任两闸正选。