【有片】洛雯「施丹轉身」入波　率美女響頭炮

周五(26日)凌晨女奧足B組，美國女足3比0大勝贊比亞女足，明星射手洛雯表演「施丹轉身」過人後入波，表現技驚四座。衞冕嘅加拿大女足賽前雖然受到「航拍機醜聞」影響，但喺A組仍以2比1擊敗新西蘭女足，旗開得勝。

美國女足被視為金牌熱門，今仗盡展霸氣，NBA傳奇「藍板王」洛文個女洛雯，17分鐘就接應隊友傳送，禁區內一個「施丹轉身」成功避開2名敵衞包夾，成功射破贊比亞大門。「美女」領先後愈戰愈勇，再由絲雲遜入多2球大勝3比0。

洛雯「施丹轉身」入波片段：https://twitter.com/i/status/1816561439080865866　

喺巴黎表演法國名將施丹嘅絕技，洛雯笑稱佢嘅過人係「洛雯轉身」，佢賽後表示：「其實我冇乜練過，只係靠直覺去踢，但結果好完美。我知道當時如果我控波，一定會被逼出射門範圍，所以我想用假動作令對方失平衡，好開心我嘅計劃成功咗！」

現年22歲嘅洛雯來頭唔少，佢爸爸係5屆NBA總冠軍、傳奇籃板王洛文。洛雯未有「女承父業」，反而進攻足球場，佢上年受訪就表示：「大家認識我，好多都係因為我爸爸。我冇諗過要超越爸爸嘅成就，只係想創造屬於自己嘅故事。」